Afbrot á Íslandi

Ritstjóri/ar/Höfundur/ar: 
Helgi Gunnlaugsson

Afbrot á Íslandi er innlegg í umræðu um íslenskt samfélag og þróun þess
frá sjónarhorni félags- og afbrotafræðinnar. Byggt er á greinum sem
sumar hverjar hafa birst áður en aðrar ekki. Stuðst er við
viðhorfamælingar, opinber gögn, fréttir af ofbeldi, gögn þolenda og
niðurstöðurnar túlkaðar í ljósi alþjóðlegs samanburðar eins og kostur
er.

Í bókinni er því svarað hvaða afbrot eru einna helst kærð til lögreglu
og hver ekki og hvers vegna en niðurstöður benda til að brotin séu ekki
færri á Íslandi en í öðrum Evrópulöndum. Jafnframt kemur fram að
síbrotatíðni meðal þeirra sem ljúka fangavist á Íslandi er mjög svipuð
og hjá öðrum þjóðum, jafnvel þó að þessar þjóðir beiti talsvert þyngri
refsingum en við Íslendingar. Ísland virðist því ekki hafa skýra
sérstöðu þegar kemur að þolendum brota og ítrekunartíðni afbrota –
jafnvel þótt íslenskt samfélag búi yfir margvíslegum eiginleikum sem eru
frábrugðnir öðrum þjóðum hvað snertir t.d. mannfjölda og legu landsins.

Höfundur spyr líka ýmissa spurninga. Hvernig er unnt að skýra
fíkniefnavandann? Dregur hert refsipólitík úr vandanum? Hvaða þættir
hafa áhrif á ólögmæta hegðun í íslenskum stórfyrirtækjum? Hvernig á hið
opinbera að bregðast við vændi? Hvers vegna koma sífellt fram kröfur um
hertar refsingar í baráttunni við glæpi? Hverju skila þær? Er
fælingarmáttur viðurlaga breytilegur eftir brotamönnum og brotaflokkum?

Helgi Gunnlaugsson er prófessor við Háskóla Íslands. Hann lauk
doktorsprófi frá Missouriháskóla í Bandaríkjunum, þar sem hann sérhæfði
sig í afbrotafræði og réttarfélagsfræði. Helgi hefur einn og í samstarfi
við aðra gefið út fjölda verka: Afbrot og Íslendingar (2000); Wayward
Icelanders: Punishment, Boundary Maintenance and the Creation of Crime
(2000); Ítrekunartíðni afbrota á Íslandi (2001); Íslensk félagsfræði
(2004); Brotaþolar, lögreglan og öryggi borgaranna (2005) og Félagsfræði
rótfestunnar: Kenningar um uppruna og eðli borgarsamfélagsins (2007).
Auk þess hafa ritgerðir eftir Helga birst víða í fræðaheiminum, m.a. í
Law and Society Review, British Journal of Criminology, Social Problems
og Nordisk Tidsskr for Kriminalvidenskab.

Útgáfuár: 
2008
Blaðsíðufjöldi: 
213
ISBN: 
978-9979-54-794-5
Verknúmer: 
U200807
Verð: 
4490