Almennir útgáfuskilmálar

Frumhlutverk Háskólautgáfunnar er þjónustustarfsemi við starfsmenn Háskóla Íslands er tengist útgáfu prentaðs máls og efnis á tölvutæku formi. Við útgáfu ritrýnds efnis eru gerðar kröfur í samræmi við ströng alþjóðleg viðmið. Háskólaútgáfan selur veitta þjónustu og höfundar þeirra verka er hún tekur að sér eru fjárhagslega ábyrgir fyrir útgáfuverkum sínum, eða einstakar rannsóknastofnanir skólans fyrir þeirra hönd. Hér á eftir fer lýsing á verkferli útgáfunnar er skýrir einstaka ábyrgðar- og verkþætti höfunda og útgáfu: 

  • Þegar samþykkt handrit liggur fyrir, er stofnað sérstakt verknúmer í bókhaldi HÍ fyrir bókina. 
  • Gerð er frum-kostnaðaráætlun miðað við fyrirliggjandi lýsingu handrits, eðli þess og umfang. 
  • Kostnaðaráætlun er færð á útgáfusamning þar sem tilgreindir eru framleiðsluþættir og kostnaður þeirra ásamt verkáætlun fyrir útgáfuna og vinnu hennar. 
  • Höfundur eða forstöðumaður stofnunar undirritar samninginn ásamt forstöðumanni HÚ 
  • Höfundar, stofnanir eða aðrir verkbeiðendur bera fjárhagslega ábyrgð á útgáfuverkum sínum. Forstöðumaður útgáfunnar veitir nánari upplýsingar um skilmála útgáfunnar.
  • Þar sem útgáfan er í eðli sínu þjónustustofnun er við upphaf verks gjaldfært grunnþjónustugjald útgáfunnar á verknúmer útgáfuverks. Gjaldinu er ætlað að mæta tilkostnaði útgáfunnar við aðstöðu og nauðsynlegan tækjabúnað; frumundirbúning útgáfunnar, s.s. áætlanagerð, öflun tilboða og samskipti við verktaka sem koma að verkinu; kynningar- og markaðsstarf; allan almennan pappírs- og póstkostnað sem og skrifstofukostnað.
  • Útgáfan selur vinnu við hvert verk, s.s. umbrot og kápuhönnun. Akstur, ljósritun og útprentun prófarka eru gjaldfærð sérstaklega sé umfang þeirra mikið. (Sjá nánar um gjöld vegna ritstjórnar og umsjónar með ritrýni undir fyrirsögninni RITRÝNI.)
  • Útgáfan sér um prófarkalestur, sé þess óskað, og er sá kostnaður gjaldfærður sérstaklega eftir því sem við á. 
  • Útgáfan sér um dreifingu og sölu allra bóka, sem og kynningu þeirra gagnvart helstu fjölmiðlum. Einnig dreifibréf á markhópa sé þess óskað og er sá kostnaður er af kynningunni hlýst innifalinn í þóknun af sölu, nema um umfangsmiklar póstsendingar sé að ræða 
  • Auglýsingar eru gjaldfærðar sérstaklega 
  • Söluþóknun útgáfunnar er 20% af skilaverði (útsöluverð – 7% vsk – söluþóknun verslana 30-35%) 
  • Útgáfan innheimtir lagergjöld af hverjum titli árlega eftir upplagi samkvæmt fyrirliggjandi gjaldskrá. 
  • Styrkir sem útgáfuverk hafa hlotið, s.s. ritstjórnarstyrkur, styrkur frá Miðstöð íslenskra bókmennta, útgáfustyrkir Rannís o.s.frv., skulu lagðir inn á verknúmer viðkomandi bókar.

 

Háskólaútgáfan annast dreifingu og kynningu erlendis á ritrýndum bókum sem og öðru efni sem talið er eiga  erindi á erlendan markað, vestan hafs og austan