Út er komin bók eftir Kristínu Aðalsteinsdóttur prófessor við kennaradeild HA sem ber nafnið Lífsfylling - nám á fullorðinsárum. Í bókinni segja konur og karlar, sem lokið hafa meistaranámi í menntunarfræði í háskólum, hér á landi eða erlendis, frá reynslu sinni af náminu; áhugahvötinni, kennslunni og leiðsögninni sem þau fengu, hvernig þeim leið á meðan á náminu stóð og hvaða ávinning þau höfðu af náminu. Bókinni er ætlað að auka skilning nemenda og kennara á þörfum nemenda sem stunda framhaldsnám í háskóla.

John Dewey í hugsun og verki er safn frumsaminna greina auk þýðinga á nokkrum greinum Deweys. Undirtitillinn er samsettur úr þremur lykilhugtökum í hugmyndafræði hans: menntun, reynslu og lýðræði. Efnistökin eru ólík, sumir kaflarnir eru heimspekilegir, aðrir eru á sviði menntunarfræði og í enn öðrum er leitast við að setja hugmyndir Deweys í samhengi við skólastarf í íslenskum leik- og grunnskólum við upphaf 21. aldar.

Fjölmenning á Íslandi fjallar á gagnrýninn hátt um ýmsa þætti fjölmenningarsamfélagsins. Kaflarnir eru tengdir nýlegum rannsóknum í viðkomandi fræðum, bæði á Íslandi og í öðrum löndum. Bókin er ætluð kennaranemum, öðrum háskólanemum, fræðimönnum og kennurum á öllum skólastigum svo og stefnumótandi aðilum.