Á Rauðum Sokkum - Baráttukonur segja frá

Ritstjóri/ar/Höfundur/ar: 
Olga Guðrún Árnadóttir

Í ritinu segja tólf konur frá uppruna sínum og aðdraganda þess að þær urðu virkir þátttakendur í kvenréttindabaráttunni undir merkjum Rauðsokkahreyfingarinnar. Þær lýsa upphafinu, umbrotsárunum og þeirri þróun sem varð til þess að þáttaskil urðu í starfseminni á miðjum áttunda áratugnum. Baráttan var hörð og rauðsokkar beittu oft óhefðbundnum aðferðum til þess að koma málstað sínum á framfæri og vöktu með því hneykslan margra og kæti annarra.

Formála ritar Olga Guðrún Árnadóttir, ritstjóri bókarinnar, en þar segir m.a:
„Rúm fjörutíu ár eru liðin síðan Rauðsokkahreyfingin, ein af merkustu mannréttindahreyfingum Íslandssögunnar, varð til. Þar sameinaðist hugsjónafólk af báðum kynjum í baráttu fyrir rétti kvenna til að njóta jafnræðis og fullrar virðingar á við karla á öllum sviðum þjóðfélagsins.
Frumkvöðlar Rauðsokkahreyfingarinnar voru konur og konur báru hitann og þungann af starfsemi hennar frá degi til dags. Margar þeirra voru virkar í hreyfingunni um árabil, aðrar stóðu skemur við. Þessar konur komu úr ýmsum áttum og höfðu ólíkan bakgrunn en eitt áttu þær allar sameiginlegt: brennandi löngun til að afhjúpa og aflétta þeirri kynbundnu kúgun sem gegnsýrði samfélagið leynt og ljóst. Þær beittu gjarnan óhefðbundnum meðulum til að vekja athygli á málstaðnum, voru hugmyndaríkar og hugrakkar og örlátar á tíma sinn og krafta. Árangur erfiðisins var þeim sjálfum ekki alltaf sýnilegur og oft gafst tilefni til að efast, einkum fyrstu árin á meðan þyngst var fyrir fæti, en hugsjónafólk kallar ekki allt ömmu sína og fyrir vikið urðu á skömmum tíma straumhvörf í jafnréttisbaráttu á Íslandi.”

Í bókinni eru birt ljóð eftir Vilborgu Dagbjartsdóttur sem flest voru ort á þessum árum og margar myndir sem aldrei hafa komið fyrir almenningssjónir.

Höfundar eru:
Auður Hildur Hákonardóttir, Björg Einarsdóttir, Edda Óskarsdóttir, Elísabet Gunnarsdóttir, Gerður G. Óskarsdóttir, Guðrún Ágústsdóttir, Guðrún Friðgeirsdóttir, Guðrún Hallgrímsdóttir, Helga Ólafsdóttir, Lilja Ólafsdóttir, Rannveig Jónsdóttir, Vilborg Dagbjartsdóttir og Vilborg Sigurðardóttir.

 Vilborg Sigurðardóttir ritar inngangsorð og Dagný Kristjánsdóttir eftirmála.

RIKK, Rannsóknastofa í kvenna- og kynjafræðum gefur bókina út í samstarfi við Háskólaútgáfuna.

Útgáfuár: 
2011
Blaðsíðufjöldi: 
453
ISBN: 
978-9979-54-926-0
Verknúmer: 
U201136
Verð: 
5900